诸金花效法受皮鞭周双玉定情遗手帕
黄翠凤未免有些秘密闲话要和钱子刚说，争奈诸金花坐在一傍，可厌已甚。翠凤眼睁睁看他半日，不禁好笑，问道：“耐坐来浪做啥？”金花道：“钱大少爷喊我上来个呀。”翠凤方才会意，却叹口气道：“钱大少爷喊耐上来末，替耐做媒人呀，耐阿晓得嗄？”金花茫然道：“钱大少爷勿曾说（口宛）。”翠凤冷笑道：“也好哉！”子刚连忙摇手道：“耐（要勿）怪俚。高亚自个脾气，我原说勿对个，一歇歇坐勿定，教俚也无处去应酬。”翠凤别转脸道：“要是我个讨人像实概样式，定归一记拗杀仔拉倒！”子刚婉言道：“耐要教教俚个，俚坎坎出来，勿曾做歇生意末，陆里会嗄？”
翠凤从鼻子里叹出一声道：“看仔倪娘姨要打俚乃末，好像作孽；陆里晓得打过仔，随便搭俚去说啥闲话，俚总归勿听耐个哉，耐说阿要讨气！”金花忙答道：“阿姐说个闲话，我才记好来里。要慢慢交学起来个呀，阿对（口夏）？”翠凤倒又笑而问道：“耐来浪学啥（口夏）？”金花堵住口说不出，子刚亦自粲然。
翠凤吸过两口水烟，慢慢的向子刚道：“俚个人生来是贱坯。俚见仔打末也怕个，价末耐巴结点个；碰着俚哉吨，说一声动一动。”说着转向金花道：“我搭耐说仔罢，照实概样式，好好交要打两转得！”金花听说，呜咽饮泣，不敢出声。翠凤却也有些怜惜之心，复叹口气道：“耐做讨人还算耐运气，碰着仔倪个无(女每)，耐去试试看！珠凤比仔耐再要乖点，（要勿）说啥打两记，缠缠脚末，脚指头就沓脱仔三只！”金花仍一声儿不言语。
翠凤且自吸水烟，良久，又向子刚道：“论起来，俚哚做老鸨该仔倪讨人，要倪做生意来吃饭个呀；倪生意勿会做，俚哚阿要饿煞？生来要打哉（口宛）。倪生意好仔点，俚哚阿敢打嗄？该应来拍拍倪马屁。就是像俚乃铲头倌人，替老鸨做仔生意，再要拨老鸨打。我总勿懂俚乃为啥实概贱嗄！”
说话之时，只听得楼下再有一肩轿子进门，接着外场报说：“罗老爷来。”黄金凤早于楼梯边迎接，叫声“姐夫，该搭来。”罗子富径往对过房间。
这里钱子刚即欲兴辞。黄翠凤一把拉住，喝令诸金花：“对过去陪陪！”金花去后，子刚方悄问翠凤道：“耐阿曾搭无(女每)说歇？”翠凤道：“勿曾。故歇去说，常恐说间架仔倒勿好。过仔节再看。该搭事体耐（要勿）管，闲话末我自家来说。罗个出仔身价，耐替我衣裳、头面、家生办舒齐仔好哉。”
子刚应诺遂行。翠凤并不相送，放下水烟筒，向帘前喊道：“过来末哉。”于是金凤手挈罗子富，珠凤跟在后面，小阿宝随带茶碗及脱下的衣裳，一齐拥至房里，惟诸金花去楼下为黄二姐作伴。
子富见壁上挂钟敲了十下，因告诉翠凤明晨有事，要早点转去困觉。翠凤道：“就该搭耐也早点困末哉（口宛），我有闲话搭耐说，（要勿）转去。”
子富自然从命，令高升和轿班回寓。翠凤喊赵家(女每)来收拾停当，打发子富睡下。赵家(女每)暨金凤、珠凤、小阿宝陆续散出。翠凤料定没有出局，也就安置；在被窝中与子富交头接耳，商量多时，不必明叙。
高升知道次日某宦家喜事，借聚丰园请客，主人须去道喜，故绝早打轿子伺候。等到子富起身，乘轿往聚丰园，已是冠裳满座，灯采盈门。
吃过喜筵，子富不复坐轿，约同陶云甫、陶玉甫、朱蔼人、朱淑人两家弟兄，出聚丰园，散步阐行。适遇洪善卿，拱手立谈。朱葛人忽想起一事。只因听见汤啸庵说善卿引着兄弟淑人曾于周双玉家打茶会，恐淑人年轻放荡，难于防闲，有心要试试他，便和洪善卿说：“好几日勿看见贵相知，阿好一淘去望望俚？”善卿亦知其意，欣然愿导。陶云甫道：“倪勿去哉。几花人跑得去，算啥嗄？”朱蔼人道：“我有道理，勿碍个。”
当时洪善卿领了罗子富及陶、朱弟兄，共是六人，并至公阳里周双珠家。双珠见这许多人，不解何故，迎见请坐，复喊过周双玉来。
朱蔼人一见双玉，即向淑人道：“耐叫仔两个局，勿曾吃歇酒，今朝朋友齐来里，我替耐喊个台面下去，请请俚哚。”朱淑人应又不好，不应又不好，忸怩一会，不觉红涨于面。罗子富最为高兴，连说：“蛮好，蛮好。”催大姐巧囡：“快点去喊！”淑人着急，立起身来阻挡道：“倪阿是到馆子浪去吃，叫个局罢？”子富嚷道：“馆子浪倪（要勿）吃，该搭好。”不由分说，径令巧囡去喊：“就故歇摆起来。”陶云甫向朱蔼人道：“耐个老阿哥倒无啥，可惜淑人勿像耐会白相。倪玉甫做仔耐兄弟，故末一淘白相相对景哉。”陶玉甫见说到自己，有些不好意思。
朱蔼人正色道：“倪住家来里夷场浪，索性让理睬白相相。从小看惯仔，倒也无啥要紧。勿然，一径关来哚书房里，好像蛮规矩，放出来仔来勿及个去白相，难末倒坏哉！”洪善卿接说道：“耐闲话是匆差，价末也要看人码。淑人末无啥要紧，倘然喜欢白相个人终究白相勿得。”说得朱淑人再坐不住，假做看单条字画，掩过一边，匿面向壁；连周双玉亦避出房外。周双珠笑道：“俚哚两家头，一样个脾气，闲话末一声无拨，肚皮里蛮乖来浪。”大家呵呵一笑，剪住话头。